मुख्यपृष्ठस्तंभरौबीलो राजस्थान : पुरस्कारेश्वर मिंदर रा मठाधीश

रौबीलो राजस्थान : पुरस्कारेश्वर मिंदर रा मठाधीश

बुलाकी शर्मा राजस्थान

टाबरपणै में इम्तियान रै दिनां म्हां भायलां नै देवी-देवता घणा चेतै आवता। जिका ई मिंदर-देवरा घर सूं स्कूल रै मारग आवता, बठै धोक देय’र चोखा नंबरां सूं पास करण री अरदास करता।
चोखै नंबरां सूं मतलब अबार री भांत सौ बट्टा सौ कोनी हो। अबार तो छोरां रै सौ री ठौड़ निन्याणवें आ जावै तो छोरां सूं बेसी बांरा मां-बाप डिप्रेसन रा शिकार हुय जावै। फर्स्ट डिवीजन आवणो ई म्हां सारू गढ़ फतह करणो हो। थर्ड कै ग्रेस सूं पास हुयां ई घरआळां नै आगली किलास में जावण सूं संतोस हुय जावतो। फेल हुयां थापा-मुक्का सूं जरूर आरती करीजती।
टाबरपणै में जिकी आदत पड़ जावै, बा मरियां ई छूट्या करै। मिंदर-देवरा जावणो अबै ई म्हनै तद याद आवै जद कोई काम अटकै कै कोई विपदा आवै। फेर सगळां रै दरबार में अरजी लगाऊं। परसाद री बोलवा करूं। चांदी रो छत्तर वैâ सवामणी करण रो वादो करूं। पण मन में ओ हुचको जरूर रैवै कै अ‍े सगळा म्हारी अरजी रो निस्तारण किण भांत करसी? स्यात सगळा मिल’र आपात बैठक करनै विचार-विमर्श कर’र म्हारो संकट दूर करैला। जे ओ विचार’र सगळा देवी-देवता नचींता हुय जावै वैâ अरजी सगळा कनै पूग्योड़ी है, जिकै नै टैम हुसी बो देख लेसी, जणै म्हारो कांर्इं हुसी?
हारी-बेमारी हुवो कै कमाऊ सीट री चावना, पुरस्कार-सम्मान कबाड़न री हूंस हुवो कै दूजा लेखक साथियां नै मात देवण री बळत, हरेक समस्या रै समाधान सारू अरजी सगळां साम्हीं राखूं। जे किणी रै साम्हीं अरजी राखण सूं चूक कर दी अर बे नाराज हुयग्या जणै? मन में ओ डर बैठ्योड़ो है।
पण अबकी राजधानी जयपुर गयो जणै बठै ‘रोजगारेश्वर महादेव मिंदर’ देख’र अफसोस हुयो कै म्हांरै टाबरपणै में परीक्षा में पास करावणियो कोई स्पेशल मिंदर हुवतो तो म्हां सगळै मिंदरां में धोक लगावण नै जावता ई क्यूं। मोटी-मोटी डिग्रियां लियोड़ा युवावां‌ नै स्यात इण मिंदर री जाणकारी नीं हुवण सूं बे बेरोजगारी नै लेय’र सरकारां नै भूंड रैया है। केंद्र अर राज्य‌ सरकारां नै सलाह देय रैयो हूं कै बे सगळां नै‌ रोजगार कोनी देय सकै पण ठौड़-ठौड़ रोजगारेश्वर मिंदर तो बणा ई सकै। इण सूं‌ अ‍ेकै साथै दो फायदा हुसी। पैलो, बेरोजगार आं मिंदरां में नौकरी सारू अरजी लगावण में‌ बिजी‌ हुय’र सरकारां नै भूंडणो बंद कर देसी। दूजो लाभ, सरकार री छवि धार्मिक बणन सूं बीं रै वोटां में‌ इजाफो हुसी। म्हैं पुरस्कारेश्वर‌ मिंदर बणा’र बीं रो मठाधीश बणसूं!

अन्य समाचार