रौबीलो राजस्थान : भगतां री चिंता

बुलाकी शर्मा राजस्थान

प्रधानजी नै चिंता में देखनै भगत ई चिंतित हुयग्या है। मणिपुर री घटनावां सूं भगत पैला सूं वाकिफ हा। मनोमन दुखी ई हा। पण प्रधानजी अबोला अर मून हा तद बे कियां बोल सकता। प्रधानजी खुलनै आपरी पीड़ राखदी तद भगत ई खुलनै आपरी पीड़ एक-दूजै साम्हीं राखण लाग्या।
एक भगत बोल्यो, ‘सैकड़ूं री भीड़ मांय दो लुगायां नै नागी करनै घुमावणो, सामूहिक बलात्कार… ओह, कित्ती भूंडी बात है।’
दूजो भगत ई दुखी हो, ‘वीडियो वायरल हुयां पछै आपणां प्रधानजी भोत दुखी है। आरोपियां नै सख्त सूं सख्त सजा दिरासी बे।’
पैलो भगत बोल्यो, ‘वीडियो अबै वायरल हुयो है पण ओ सूगलो कांड हुयां दो-ढाई महीनां सूं ज्यादा हुयग्या है। दुखियारी लुगायां पुलिस थाणै सिकायत ई दरज कराई पण सुणै कुण। कित्तै अफसोस री बात है वैâ प्रधानजी नै इणरी जाणकारी तुरत-फुरत कोनी दिरीजी। विडियो वायरल हुयां पछै पूरी दुनिया साथै ई बां नै पतो लाग्यो। इंटेलिजेंस ब्यूरो जिसी सगळी सरकारी एजेंसियां री विफलता रो भूंडो चैरो सामनै आयग्यो है।’
‘एजेंसियां विफल कोनी भाईजी। बे आपरी रीति- नीति सूं काम करियो है। जठै डबल इंजन री सरकारां है, बठै री कमियां नीं, उपलब्धियां बां ताई पूगाई जावै।’
‘पण विरोधी दलां री सरकारां री कमियां तो प्रधानजी दड़ाछंट गिणावता रैवै।’ दूजो भगत समझायो, ‘विरोधी दल री सरकारां सिंगल इंजन री हुवै। बां री उपलब्धियां नीं, कमियां री प्रधानजी तांई रिपोर्ट करीजै।’ पैलो भगत फेर सवाल फेंक्यो, ‘डबल इंजन री सरकारां री कमियां प्रधानजी ताई क्यों नीं पूगाई जावै?’
दूजो भगत जवाब दियो, ‘क्यूंवैâ इसी सरकारां रा प्रधान ड्राइवर खुद प्रधानजी है अर छोटा ड्राइवर बीं राज्य रा मुखियाजी हुवै। इसा राज्यां में कमी काढणी मतलब प्रधानजी नै भूंडा बतावणो हुयो। इसी गुस्ताखी कुण करैला। मणिपुर में सिंगल इंजन री सरकार हुवती तो बा कद ई बर्खास्त करीज जावती। बठै डबल इंजन री सरकार हुवण सूं प्रधानजी नै बठै री दुरदसा कोनी बताईजी।’
पैलो भगत रीस में वैâयो, ‘मणिपुर री सरकार नाजोगी है। म्हारै विचार सूं इसी सरकार नै बर्खास्त कर देवणो चाईजै। आपरो क्या विचार है?’ दूजै भगत भगतीभाव सूं बोल्यो, ‘आपां तो प्रधानजी वैâवै जियां करां। सोचण-विचारण तो काम आपांरो कोनी।’
पैलो भगत अबै कोई सवाल कोनी करियो पण सवालिया निजरां सूं दूजै भगत नै देखण लाग्यो।