मुख्यपृष्ठस्तंभरौबीलो राजस्थान : दुआवां रो चमत्कार

रौबीलो राजस्थान : दुआवां रो चमत्कार

बुलाकी शर्मा राजस्थान
लारला दिनां कवि धाकड़जी रो बीपी लॉ हुयग्यो जणै बां नै अस्पताल में भरती हुवणो पड़ियो। हाई बीपी रा मरीज तो बे बरसां सूं है पण अचाणचक लॉ हुवण सूं बे डरग्या। हाई ब्लड प्रेशर रैवण सूं बे खुद नै हाई प्रोफाइल शख्सियत मानै पण लॉ हुवतै ई बांरो डिप्रेशन हाई हुयग्यो। ब्लड री जित्ती तरह री जांचां हुय सकै, डॉक्टरां करवाई, भांत-भांत री दवायां दीवी, पण बीपी नार्मल हुवण रो नांव ई नीं लेवै।
कोई वीवीआईपी अस्पताल में भरती हुवै जणै दिन में चार-पांच बार वां री बीमारी रो बुलेटिन करीजै कै आदरजोग री स्थिति स्थिर है कै पैला सूं कीं सुधार है कै स्थिति चिंताजनक है पण नियंत्रण में है। वीवीआईपी री बीमारी खबरां री हैड लाइन बणिया करै पण इण नुगरै समाज में अ‍ेक कवि रो इसो मान कठै। घर-परिवारआळा ई जद कवि-करम नै बिरथा-करम मानै जणै समाज लारै कियां रैवै। जिका मंचीय कवि है, कविता रै नांव माथै चुटकला सुणावण में जिणां नै महारथ है, बे सेलिब्रिटी बणियोड़ा है। बे रोकड़ा बटोरै अर आदर-सनमान पावै। पण धाकड़जी जिसा खरा साहित्यिक कवि ना पैरोडी सुणा सकै, ना लटका-झटका करनै वेज-नॉन वेज चुटकला सुणा सकै अर ना ही सत्ता री विरुदावली रा गीत गा सकै जणै ना तो बां जिसा कवियां नै मंच मिलै अर ना सेलिब्रिटी बाजै।
अस्पताल में आम मरीजां री भीड़ बणियोड़ा पलंग माथै पसरियोड़ा सूता कविराज डॉक्टरां री निजर में आम हा पण सोशल मीडिया रा सेलिब्रिटी हा। दो-दो घंटा छेड़ै फेसबुक माथै आपरी बीमारी रो बुलेटिन जारी करता रैया अर सगळां सूं बेगो स्वस्थ हुवण री दुआवां करण रो अनुरोध करता रैया। हरेक बुलेटिन ऊपरां सैकड़ूं दुआवां… कुल मिलायनै हजारूं। दुआवां रै चमत्कार सूं धाकड़जी रो बीपी‌ अ‍ेकदम नॉर्मल हुयग्यो।
इण चमत्कार सूं डॉक्टर अचंभै में कै ओ कियां हुयग्यो। स्यात डॉक्टर इण जतारथ सूं अणजाण है कै कवियां री बीमारी री मूल वजह बतावणियो इंस्ट्रूमेंट कै इन्वेस्टिगेशन ओजूं दुनिया में इजाद ई कोनी हुयो है। कवि सम्मेलनां रै दौर में आयोजकां कानी सूं मिलियोड़ा रोकड़ा अर श्रोतावां री दाद बीपी घटावती-बधावती अर अबै सोशल मीडिया रै दौर में लाइक और कमेंट री घटत-बढ़त बीमारी री वजह बणै। बां री पोस्टां माथै लारला केई दिनां सूं लाइक अर कमेंट जाबक ई कमती आ रैया हा जणै बां रो बीपी गड़बड़ायग्यो। अबै मिलिया हजारूं कमेंट्स बां नै निरोगा कर दिया।

अन्य समाचार