रौबीलो राजस्थान : जूं री हवाई-जातरा

बुलाकी शर्मा राजस्थान
पैली बार हवाई-जातरा करण रो मजो ई न्यारो है। अमेरिकन एयरलाइंस रो विमान है। लॉस-एंजिल्स एयरपोर्ट माथै मैडम री जांच करीजी जणै म्हैं डर’र बीं रै माथै री चामड़ी रै चिप’र बैठगी। थैंक्स गॉड वैâ म्हैं पकड़ीजी कोनी।
संजोग सूं म्हारी मैडम सूं मिलण सारू बीं‌ री प्रैंâड ‌न्यूयार्क सूं लॉस एंजिल्स आई। म्हनै हवाई-जातरा रो सपनो पूरो हुवतो लखायो। खा-पीय’र दोनूं भायल्यां डबल-बेड माथै पसरनै पुराणी बातां में रमगी अर म्हैं चतराई सूं मैडम री भायली रै सिर रा बालां में रमगी।
बंतळ में म्हारी मैडम आपरै हसबैंड अर बीं री भायली लिव इन रैवणियै आपरै प्रैंâड नै बां माथै ई डिपेंड बतावती अफसोस कर रैयी ही। म्हारी जमात ई परजीवी है। दूजां माथै डिपेंड रैवै। जिवैâ रै सायरै रैवां, बीं रो ई खून पीवां। विधाता रो ओ ई विधान है। पण मिनखा-जूण में ई म्हारी जमात रा जीव है अर बे निजू सम्बंधां रै सायरै आपरै निजूं लोगां रो खून चूसता रैवै, आ जाणनै भोत पीड़ा हुई। पण म्हैं तो हवाई-जातरा रै सपना में मस्त ही। बां री बंतळ सूं म्हनै कांई!
जातरा बिचाळै एयर हॉस्टेज रो मीठो-मधरो सुर सुण’र बीं नै देखण रो मन हुयो। इत्ता मीठा बोल है जणै खून ई मीठो हुवैला। बीं रै माथै रै बालां में घुसण री तजबीज बैठ जावै तो फेर बीं रो मीठो खून पींवता हवाई-जातरावां करती रैयसूं। माथै री चामड़ी छोड’र म्हैं बालां ऊपरां आयगी। एयर हॉस्टेज अर दूजा मुसाफिरां नै म्हैं सावळ देख्या ई कोनी कै एयर हॉस्टेज री निजर म्हारै माथै पड़गी अर बा चमकनै म्हारी मैडम कनै आई। म्हैं डरगी। मैडम नै तो म्हारै आवण रो ठाह ई कोनी हो जणै म्हारो टिकट तो लेवण सूं रैयी। अबै बिना टिकट जातरा करण री सजा मिलणी पक्की है। म्हैं पाछी चामड़ी रै चिप’र बैठगी।
एयरलाइंस म्हारै हुवणै नै भोत सीरियसली लियो अर न्यूयार्क सूं पैला बिचाळै ई फीनिक्स में इमरजेंसी लैंडिंग करवाय दीवी। म्हारी वजह सूं मुसाफिरां नै बारह घंटा होटल में रैवणो पड़ियो पण एयर लाइंस जातरा डायवर्ट करण री वजह म्हारी ठौड़ मेडिकल इमरजेंसी नै बताई। अफसोस कै म्हारै जिसा जीवां नै मिनख खतरनाक मानै पण मिनखा-जूण में ई परजीवी बणियोड़ां नै सिर-माथै बैठावै।
खैर, फीनिक्स रुक’र फेर न्यूयार्क तांंई हवाई-जातरा करनै म्हैं मैडम रै बंगले पूगगी हूं। म्हारो आगै कांई हुवणो है, गॉड नोज!