बुलाकी शर्मा
राजस्थान
म्हारा एक लेखक-साथी पाठकां री तर-तर हुवती छीजत नै लेय’र भोत चिंतित है। कैवण लाग्या, ‘लेखकां री तादाद बधती जा रैयी है अर पाठकां रो काळ पड़न लाग रैयो है। जिकै साथी नै कोई किताब सप्रेम भेंट करां, बो ही बीं नै कोनी बांचै जणै निखालिस पाठकां नै दोस ई कियां देवां।’
लेखक-साथी री बात सूं सहमत हुवता थकां ई म्हैं बां रै समर्थन में नसड़ी कोनी हिलाई क्यूंकै म्हैं जाणग्यो हो कै बे आ गुगली गेंद फेंक’र म्हनै आउट करण री फिराक में है।
आपां खुद री कमियां ढकण सारू सामलैै माथै पहलै सूं ई सवासेर बणन री कोसीस करां ताकै बो आपांरी कमियां नीं गिणा सकै। म्हैं ओ ई तरीको काम में लियो। दूजां नै बांचण में आपांरै ई बारै बजियोड़ी है पण हाकूं इयां जाणै म्हासूं तगड़ो पढाकू दुनिया में ई कोनी। बां म्हनै आपरी चार-पांचैक किताबां चार-पांच महीनां पैला सप्रेम भेंट करी ही पण म्हैं ना बां नै बांची, ना बां माथै अेक हरफ ई लिख्यो। बां री भेंट आळी बात सुण’र म्हारै मिरच्यां लागगी।
म्हैं गंभीर बणनै कैयो, ‘पाठक तो है पण आ वैâय सकां वैâ बे ‘चूजी’ हुयग्या है। जिकी किताब बांनै हांट करै, बा बे बांचै पण जिकी में धूड़ रा दो दाणा ई नीं हुवै, बीं नै बे कचरो माननै डस्टबिन रै हवालै कर देवै। चायै बा भेंट में मिलियोड़ी ई क्यूं ना हुवो।’
बां रै लाय लागगी, ‘मतलब म्हारी भेंट करियोड़ी किताबां आप डस्टबिन में न्हाखदी?’
म्हैं मुलायमियत सूं कैयो, ‘खुद री किताबां नै आप डस्टबिन में फेंकण लायक बता रैया हो? आप तो इयां ना कैवो।’
बे चिड़ग्या, ‘आप कैय रैया हो नीं।’
‘आपरी किताबां रो म्हैं नांव लियो कांई, बतावो?’ फेर सीधो भालो फेंक्यो, ‘म्हैं ई म्हारी दो किताबां आपनै सप्रेम भेंट कर राखी है। बां माथै आप ओजूं एक आखर ई मांड्यो हुवै तो बतावो।’
बे निमळा पड़ग्या, ‘पहलै आप लिखो फेर म्हैं लिखसूं।’
‘ना, पहलै आप।’
‘ना सा’, मिठास सूं बां वैâयो, ‘आप म्हासूं उमर में मोटा हो। पहलै आपरो आसीरवाद जरूरी है।’
म्हैं बां नै आभै चढाया, ‘लेखन में आप म्हासूं आगै हो। पहल को आपनै ई करणी पड़सी सा।’
बांचण री लत सूं म्हे दोनूं कोसां दूर हा जणै पहलै आप, पहलै आप वैâयनै एक-दूजै नै आरसी दिखावण में लाग्योड़ा रैया।
साचैई पाठकां रो काळ पड़ग्यो है!