मुख्यपृष्ठस्तंभरौबीलो राजस्थान : सोशल मीडिया माथै चावो रैवण रा गुर

रौबीलो राजस्थान : सोशल मीडिया माथै चावो रैवण रा गुर

बुलाकी शर्मा राजस्थान

सोशल मीडिया माथै बो ही सोशल मानीजै जिको बराबर सक्रिय रैवै। वाट्‌सअप, फेसबुक, इंस्टाग्राम, ट्विटर आद जित्ता ई प्लेटफार्म है, बठै आपरी पोस्ट अर फोटू चेपतो रैवणियो सोशल मीडिया री दुनिया में भोत चावो मानीज्या करै। सोशल दीखतो रैवण सारू ओ पण जरूरी है वैâ खुद री पोस्टां लगावण रै साथै आभासी भायलां री पोस्टां नै लाइक अर कमेंट करणो। पढ़णो जरूरी कोनी, बस बां री तारीफ में टाळवां इमोजी चेपता रैवो।
सोशल मीडिया में सक्रिय रैय’र ई आपां लोगां री यादां में बण्या रैय सकांं। रोजीना अ‍ेक-दो पोस्ट लगावणिया ई जद निजर कोनी चढै तद हफ्ते में अ‍ेकर मूंडो देखावणियै नै कुण चेतै राखसी। सोशल मीडिया माथै चौबीसूं घंटा सोशल बण्यो रैवणो जरूरी है। हरेक गतिविधि सोशल मीडिया माथै आवणी चाइजै। हैप्पी बर्थ डे सेलिब्रेट करो। खुद रो, जोड़ायत रो, बेटा-बेटी, पोता-पोती, दोहिता-दोहिती, मां-बाप, दादो-दादी, भाई-भौजाई, फुंफो-जवांई, भायलो-भायली, साळो-साळी कोई नै बाकी कोनी छोडणो है। घर रै धुरी मोड़ै ‘कुत्ते से सावधान’ तख्ती लगावण रो सुअवसर दिरावणियै डॉगी रै हैप्पी बर्थ डे री पोस्ट लगावण में ई चूक नीं हुवणी चाइजै। दुनिया छोड ‘र फोटू बण’ र जिका प्रâेम में मंडीजग्या है, बां नै याद करतांं इमोशनल पोस्ट लगावो। गंजी-कच्छा खरीदो वैâ नवी बाइक वैâ सेकंड हैंड कार, आभासी दुनिया सूं बधाई लेवो। किणी रै आंगळी करतांं थांरी आंगळी जखमी हुय जावै तो ई आंगळी रै प्लास्टर चढा’र आभासी दुनिया सूं सहानुभूति रा कमेंट लेवण सूं चूकणो नीं है।
सित्तर-पिचत्तर नै टैग करियां पछै ई दस-बारह लाइक अर तीन-चार कमेंट मिलण सूं अ‍ेकर म्हैं डिप्रेशन में आयग्यो हो। कीं सोच’र प्राइवेट अस्पताल में भरती हुयग्यो। डॉक्टर साब भोत भला हा। बिना जरूरत म्हनैं भरती राख्यो। बांरो ध्येय म्हारी जेब हळकी कर’र आपरै बिल री राशि बधावणी ही अर म्हारो ध्येय फेसबुक लाइक बधावणो हो। अस्पताल रै बेड माथै सूत्यै रा इसा इमोशनल फोटू खैंचाया जाणै म्हैं थोड़ा दिनां रो ई मेहमान हूं। लखदाद म्हारा आभासी फ्रेंड्स नै कै बां लाइक अर कमेंट री मूसळाधार बिरखा कर दीवी। आपांरो जी सोरो हुयग्यो। अस्पताल में भरती रैवण रा पईसा ऊगग्या। म्हारी‌‌ बेमारी नै गजब री पब्लिसिटी मिली। लाइक अर कमेंट‌ री‌ कमी हुयां बीं टैम रा फोटू सोशल मीडिया माथै चेप’र लाइक-कमेंट रो आनंद अबार ई लेवतो रैवूं। सोशल मीडिया में चावो बणनो है तो आप ई नवाचार करता रैवो।

अन्य समाचार