बुलाकी शर्मा राजस्थान
सरकारां नै आपरै अफसरां अर कर्मचारियां माथै जाबक ई भरोसो कोनी। बा मानै कै राज री नौकरी में आवणियै मोटै अफसर सूं लेय’र छोटै सूं छोटो कर्मचारी भ्रष्टाचारी है। बां नै भ्रष्टाचार रै दागां सूं बचावण सारू भ्रष्टाचार निरोधक विभाग बणाया। आम बोलचाल में जिणरी साख अेसीबी नांव सूं है।
अेसीबी रो नजरियो सरकार री भांत नकारात्मक नीं, सकारात्मक है। अेसीबी सरकारी अफसरां अर कर्मचारियां नै भ्रष्टाचारी नीं, खरा अर ईमानदार मानै। चला’र बा किणी नै नीं झालै। पण जियां लंकापति रावण रा गुप्ताऊ राज बां रो भाई विभीषण उजागर करिया बियां ई निजू लोग ई अेसीबी साम्हीं आपरै निजू लोगां रा गुप्ताऊ राज खोलै। बां नै रंग सूं रंगियोड़ा रोकड़ा लेंवतै झलावै, फाइलां रा कबाड़ा उजागर कर’र पकड़ावै।
झालीजै जिको भ्रष्टाचारी, दूजा सगळा ईमानदार। अेसीबी भ्रष्टाचार रै आरोपी नै झालै। बीं रै खिलाफ अदालत में मामलो दर्ज करावण री स्वीकृति रो अधिकार सरकार रै प्रशासनिक विभाग कनै है। अभियोजन माथै फैसलै री समय सीमा च्यार महीना है पण प्रशासनिक विभाग रा मोटा सरकारी अफसर आपरै दागी सरकारी भाई-बंधवां रै खिलाफ फैसलो लेवण में बियां ई उळझन मैसूस करै जियां कै महाभारत जुद्ध सरू हुवण सूं पैला अर्जन करियो। आपरै भाई-बांधवां-गुरुजनां रै खिलाफ शस्त्र उठावण सारू बो भगवान स्री क्रिसण सूं गीता रो ग्यान सुण’र त्यार हुयो।
अफसरां रो संशय मैटण सारू भगवान स्री क्रिसण आवण सूं रैया। जणै बे ल्याई अभियोजन स्वीकृति सारू आयोड़ा प्रकरणां रा निस्तारण कियां करै। राजस्थान सरकार रै प्रशासनिक विभाग कनै जनवरी, २०२३ सूं जनवरी, २०२६ तईं रा, बारह सौ सूं बेसी प्रकरण पैंडिंग है। आं मांय अेक विधायकजी, राजस्थान प्रशासनिक-पुलिस सेवा रा अधिकारी, डॉक्टर, तहसीलदार, गिरदावर, पटवारी आद है अर आ जाणकारी विधानसभा सत्र में अेक माननीय विधायकजी रै सवाल रै जवाब में दिरीजी है।
समय सीमा कदैई खतम हुयगी पण भ्रष्टाचार रा दागी आपरै सरकारी भाई-बांधवां रै खिलाफ अभियोजन स्वीकृति रो फैसलो करण सारू बां रो मन साथ नीं देय रैयो है। अफसरां नै अफसोस है वैâ भ्रष्टाचार रा दागी राजनेता आपरी पार्टी सूं पळटी मार’र सत्ता री शरण में आय जावै जणै सत्ता बां नै धुलाई मशीन सूं धोय’र इसा चमकावै कै भ्रष्टाचार रै कोढ़ियै रंग रा दाग ई गायब हुय जावै। भ्रष्टाचार दाग-सफा धुलाई मशीन रो उपयोग जद सत्ता कर रैई है जणै प्रशासनिक विभाग नै धुलाई मशीन अलॉट क्यूं नीं करीज सवैâ? मशीन अलॉट हुयां प्रशासन विभाग तय समय सीमा सूं पैला ई आपरा दागी सरकारी भाई-बांधवां रा प्रकरण सलटा दैसी।