बुलाकी शर्मा, राजस्थान
वोओ वो इयां कांई डर रैया हो म्हांरा व्हाला घुसपैठियाजी? विषम परिस्थितियां सूं मुठभेड़ कर’र खुद रो मुलक छोडनै अठै रैवास करण रो हौसलो करियो है, फेरूं ई डर रैया हो?
आप स्यात भूलग्या वैâ अबार चुनावी रुत में वोट कबाड़न सारू आपनै भूंडणा जरूरी है। देस री सींव री सुरक्षा में लाग्योड़ा जाबाजां नै चकमो देय’र आप पधारता रैया हो अर स्सो कीं ध्यान में हुवता थकांई म्हें ‘सबै भोम गोपाल की’ भाव नैं अंगीकार करतां अणदेखी करता रैया हां। आप ई बताओ व्हाला घुसपैठियाजी! चुनावी रूत नै टाळ’र आपनै पकड़न री वैâ भगावण री बातां म्हें करां हां कांई? आप सगळां बिचाळै रळ-मिळनै रैवो, आधार कार्ड ई बणवावो, बीजळी-पाणी-मोबाइल फोन री सुविधावां पण लिरावो, काम-धाम ई करो पण सरकार अर प्रशासन आंख्यां मींच्योड़ी राखै। आपां बिचाळै चोर-सिपाही कै लुक-मींचणी रो खेल चालतो रैयो है अर चालतो रैयसी, चिंता क्यूं कर रैया हो आदरजोग।
अबार चुनावी रुत में तो आपनै सोध-सोध’र देस सूं काढ़ण रो अेलान म्हांनै करणो ई पड़सी। पश्चिम बंगाल में ममता दीदी नाक में दम राख्यो है जणै बठै रा वोटरां नै चकारै में लावण सारू आपनै बठै सूं निकाळण री बातां करणी जरूरी है ताकै वोटर म्हांनै साचा राष्ट्र भगत मानै अर म्हांरी सरकार बणन री बिद बैठै, इण उम्मेद में आपनै टूल बणाया है, केरल में ई इणी उम्मेद में आपनै भूंड्या, नाराज ना हुया प्लीज। असम में दस बरसां सूं म्हें राज करां, बिहार में ई राज में हां, बठै ई म्हें आपरै नांव नै डट’र भुनायो। जे म्हांरी आपसूं नाराजगी हुवती वैâ आपनै खदेड़न री योजना हुवती जणै राज नै कित्तीक देर लागै, आप ई जाणो।
देखो म्हांरा बेली जी! घुसपैठ में म्हें उस्ताद रैया हां अर आपरी लीलावां सगळी जाणां। बिहार रै सुशासन बाबू रै राज में घुसपैठ कर’र म्हां बांनै बिहार सूं किक मार’र दिल्ली पूगाय दियो। दूजा राज्यां में ई घुसपैठ करनै सत्ता कब्जाय लीवी। अेक जिसै धंधैआळा आपस में भाईचारो निभावै। चुनावी रुत में आपनै गाळ्यां काढ़ां जणै प्लीज माइंड में ना लिया। चुनावां पछै आपरो नांव ई कोनी लेवां। जे विरोधी रोळो-रप्पो करसी जणै आपां कनै अचूक सबद बाण है- घुसपैठिया तो नेहरू जी रै जमाने में आया। दोसी बे है म्हैं कोनी। बस, आप सूं इत्तीक अरज है म्हांरा हेताळू घुसपैठियाजी वैâ चुनावी रुत में लुकियोड़ा रैया। फेर पैला दांई मौज-मस्ती करता रैया।