बुलाकी शर्मा, राजस्थान
क्रांतिचेता संत-कवि कबीर री दूजी सीखां म्हनैं सूट कोनी करै पण बां री आ सीख म्हैं आत्मसात कर राखी है कै ‘निंदक नियरै राखिए, आंगण कुटी छवाय। बिन पानी, साबण बिना, निर्मळ करै सुभाव।’
कबीरदास जी म्हाराज सुभ-सुभ बोलणो जाणता ई कोनी हा। बां रो उसूल हो- खरी-खरी खळकावो अर सोरा-सुखी रैवो। दूजां नै ई बे आ सीख दीवी कै निंदक नै नियर राखो। घर में ई अेक कुटिया बणाय निंदक नै पूरी सुख-सुविधा सूं राखो। निंदक आठूं पहर थां रै नियर रैसी, थां में काण-कसर निकाळतो रैसी अर थांनै सुधरण रो मौको मिलतो रैसी।
कबीर जी सूं सीख लेय’र म्हैं निसरारथ भाव सूं दूजां नैं सुधार’र बां नै चोखा मिनख बणावण री खैचळ करतो निंदक री भूमिका ईमानदारी सूं निभाय रैयो हूं। निंदक बणनो सोरो को है नीं, म्हैं म्हारै बरसां रै तजुरबै सूं कैय रैयो हूं। निंदक रो ‘ध्येय’ दूजै री कमियां अर खामियां चौभाटै कर’र बीं नै सही मारग चालण री सीख देवण रो हुवै पण अफसोस कै बदळै में बीं नै धोबा-धोबा भूंड मिलै। भूंडीजतो थकांई जिको निंदा करण रै मारग पूरी द्रिढ़ता सूं चालतो रैवै, साचो निंदक बो ही है। बरसां-बरस री तपस्या रो प्रताप है कै म्हैं म्हारै निजू लोगां, खासमखास भायलां सूं लेय’र खुद री जोड़ायत’र औलादां तकात री निंदा समभाव सूं करतो रैयो हूं।
निंदक आ मान’र चालै वैâ म्हनैं टाळ’र दूजा सगळां में खोट ई खोट है अर बो बां री खोट उजागर करनै भलाई रो काम कर रैयो है। बरसां सूं म्हैं ओ भलो काम कर रैयो हूं पण दूजा इणनै भलो नीं, भूंडो काम मान’र पर-पूठ म्हारी निंदा करता रैया है। साम्हीं मूंडै निंदा करणियो खारो आक लागै पण साम्हीं तारीफ अर पर-पूठ निंदा करणियो मिसरी सूं ई मीठो लागै। ओ मानवी सुभाव है। जी कड़ो कर’र म्हैं आ तय करी कै साम्हीं मूंडै निंदा करणी बंद कर’र सुभ-सुभ बोलणो सरू कर दूं। घर-परिवार, भायला-पापैला, जाण-पैचाणआळा सगळा राजी रैसी। सगळां सूं सम्बन्ध चोखा बणसी। चोखै सम्बन्धां रो लाभ मिलसी। निंदा करण री जे मन में हूक उठसी तो पर-पूठ कर लैसूं। म्हैं आ कोसीस करी पण दूजां नै भरोसै नीं हुयो। पर-पूठ म्हारी निंदा हुवण लागी कै भाइड़ो भोत चालू है। मीठी-मीठी बात्यां कर’र आपां री मन री बात्यां बारै कढ़ाय’र बां नै चौभाटै करणो चावै! बच’र रैया इण निंदक सूं। अबै आप ई बताओ, इण निंदक नै कांई करणो चाइजै?