बुलाकी शर्मा राजस्थान
स्कूल में पढ़ती बेळा प्रेम-व्रेम रा भाव जलमण रा चांस ई कोनी हा पण कॉलेज में प्रवेस लियो तद मन में प्रेम री खदबद हुवण लागी क्यूंकै कॉलेज में कॉ-अेजुकेशन री व्यवस्था ही। कस्बै में बो अेकूको कॉलेज हो जणै छोरां नै छोरियां साथै पढ़ण रो सौभाग मिल रैयो हो। पण अफसोस कै दोनां बिचाळै रो अनुपात भोत खराब हो। म्हारी क्लास में चालीस छोरां बिचाळै फकत चार छोरियां पढ़ती ही। पूरी कॉलेज री बात करूं तो सगळी मिलायनै बीस-बाईस छोरियां हुवैला जद कै छोरां री फौज धपटवीं ही-सवा सौ-डेढ़ सौ रै अड़ै-गड़ै। छोरां नै छोरियां देखण सूं ई धाप कोनी आवती।
प्रेम री लिफ्ट माथै चढ़ण सारू किणी कन्या नै गिफ्ट भेंट करण सारू म्हे छोरा चकरीबम बण्या रैंवता। बीं टैम छोरां रो फरज छोरियां नै गिफ्ट देवण रो हुया करतो अर छोरियां रो फरज हुवतो गिफ्ट लेवण रो। गिफ्ट लेण-देण रो ओ ही तरीको हो। दूजा भायलां दांई म्हैं ई म्हारी पेंट अर कमीज री जेब साथै बैग में बटवो, इत्र, नेल पालिस, लिपिस्टिक आद छोटा-मोटा गिफ्ट लियां छोरियां नै भेंट करण रो फरज निभावण सारू हर टैम मुस्तैद रैंवतो पण छोरियां इत्ती नखरैल हुया करती ही कै गिफ्ट लेवण रो आपरो फरज निभावण नै त्यार ई कोनी हुवती।
ब्यांव हुयां पछै तो सुपनै में ई किणी कन्या रा दरसण हुय जावै तो श्रीमतीजी सुपनै में ई आंख्यां काढ़ता निजर आवण लागै। अबै तो श्रीमतीजी नै गिफ्ट देवण रो फरज निभावणो पड़ रैयो है। बे गिफ्ट लेवण रो आपरो फरज निभावण में इत्ता उस्ताद है कै म्हारै जलम दिवस ऊपरां ई म्हनै गिफ्ट देवै नीं, म्हासूं लिया करै। कैवै कै म्हैं थांरी अर्धांगिनी हूं जणै म्हैं गिफ्ट देवण री नीं, लेवण री हकदार हूं।
पुणे स्हैर री अेक खबर बांचनै बरसां पुराणी गिफ्ट लेण-देण री कथा म्हारै चेतै आई है। अेक पति आपरी पत्नी सूं तलाक सारू फैमिली कोर्ट में तलाक री अर्जी लगा राखी है। पत्नी कैवै कै म्हैं पैली मुलाकात में म्हारै पति नै अेक अफ्रीकी तोतो गिफ्ट करियो हो। तोतो पाछो करियां ई म्हैं तलाक देसूं, पैला नीं।
खबर बांचनै म्हनैं तसल्ली हुई कै म्हनैं म्हारी पत्नी आज तांई कोई गिफ्ट कोनी दियो। जे बां भूल सूं ई कोई गिफ्ट देय देंवती तो मौके-टोकै म्हनै बीं सूं इत्ती बातां सुणनी पड़ती कै म्हारै काळजै में बेजका ई बेजका हुय जावता।