बुलाकी शर्मा राजस्थान
देवां रा देव सनीदेव। सगळां सूं करूड़। सूरज भगवान रा मोबी बेटा पण आपरै बापूजी रै अन्याव सूं नाराज हुय’र बां नै दुसमी मानणिया।
जद बे आपरी मां छियां रै गर्भ में हा, तद बांरी मां शिव-भगती में खावण-पीवण री सुध नीं राखी। बां री कमजोरी रो असर कोख में पळतै सनी देव माथै हुयो। बे कोयलै जिसा काळा जलमिया। सूरज बां नै आपरो बेटो मानण सूं नटग्या अर बां री मां माथै भूंडा इल्जाम लगावण लाग्या।
मां साथै हुवतै अन्याव रो बदळो लेवण सारू बां शंकर भोळै री साधना करी। शंकर वरदान दियो कै सगळा नवग्रहां में सबांसूं श्रेष्ठ ठौड़ थारी हुसी अर मानखो कांई, सगळा देवता ई थारै नांव सूं कांपसी। बां रै समदीठ व्यवहार सूं राजी हुय’र परमात्मा बां नै तीनूं लोक रा न्यायाधीश थरप दिया।
बे अन्याव रा बैरी है। सूरज, चांद, मंगळ, बुध, बिस्पति, शुक्र, सनी, राहू अर केतु- आं नवग्रहां में स्सै सूं मोटो कुण, इणरो फैसलो करण में उज्जैन नगरी रा राजा विक्रमादित्य पखापखी करी। सोने, चांदी, पीतळ, लोह आद धातु रा नव सिंघासणां में बां नै लोहै रै सिंघासण बैठाया। जणै बां रीस में कैयो कै थूं गलत फैसलो कर’र न्याय री मजाक बणाई है राजन। अबै थनै साढ़ै साती री सजा भुगतणी पड़सी। विक्रमादित्य रो राजपाट चौपट हुयग्यो, दर-दर भटकणो पड़ियो, जेल री हवा खावणी पड़ी।
सनी महाराज री लीलावां म्हनैं शनि शिंगणापुर मिंदर रै भगतां सारू जारी नवै फरमान री जाणकारी मिल्यां पछै अचाणचक चेतै आयगी। अठै आखै देस रा भगत पूगै। मनोकामना पूरण करण री अरदास करै। भेंट-चढ़ावै सूं पुजारी राजी हुवै, सनी देव तो भगतां री भावनावां रा भूखा है। भगत ब्रांडेड तेल सूं अभिषेक करै वैâ ऑर्डेर्नरी सूं, बां सारू अेक बरोबर। पण अबै पंचायत अर मिंदर ट्रस्ट भगतां नै मिंदर रै बारै, फिक्स दुकानां सूं ब्रांडेड तेल खरीदण सारू पाबंद करिया है। ब्रांडेड तेल सूं ई बां रो अभिषेक करियो जासी। दूजै तेल माथै रोक लगा दीवी।
लागै वैâ मिंदर ट्रस्टी अर पंचायत सनी महाराज रै न्यायाधीश रूप सूं अणजाण है अर इण आदेश रै ओळावै आपरी जेब भरण री जुगत भिड़ाई है। आपरै बापू री गलती नै माफ नीं करणिया सनी महाराज आपरै भगतां री भावना री मखौल बणावणिया नै कियां बखसैला! फरमान जारी करणिया नै जे साढ़ै साती री सजा सुणा दीवी जणै? सोचतां ई डर लागै।
रौबीलो राजस्थान : सनी महाराज री साढ़ै साती
