मुख्यपृष्ठस्तंभरौबीलो राजस्थान : दान दियां धन घटै ...चंदो दियां धन बधै

रौबीलो राजस्थान : दान दियां धन घटै …चंदो दियां धन बधै

बुलाकी शर्मा
राजस्थान

गरीब-गुरबां, जरूरतमंदां नै जिको आर्थिक सैयोग करीजै बो दान मानीजै अर जद किणी छोटी-मोटी संस्थावां वैâ राजनीतिक पार्टियां नै करीजै तद बो दान री ठौड़ चंदो मानीजै। आपांरै शास्त्रां में ई दान रो भोत महातम बतायो गयो है वैâ दान करियां धन कदैई कमती कोनी हुवै।
मिनख-जमारो सुधारण सारू सगळा आपरी सामरध मुजब दान करै। शास्त्रां में गुपतदान नै महादान बतायो गयो है। दानी जाणै कै इहलोक में गुपतदान करियोड़ै माथै परलोक में बिराजिया चित्रगुप्त भगवान पूरी निजर टिकायोड़ा है। तुरता-फुरत बे पुन्न रै खाते में दान री अ‍ेंट्री दर्ज कर देसी अर बांरो आगोतर सुधर जासी। बां सारू पुष्पक विमान आसी अर बे सीधा सुरगलोक सिधारसी।
आपांरा संत-महातमा दान री महिमा रो तो बढ़-चढ़नै बखाण करियो है पण चंदे री महिमा माथै मून है। चंदे सूं परलोक सुधरणै रो कोई संदेश आपांरै पुराणा शास्त्रां में निजर कोनी आवै पण आज रै ‘शास्त्रां’ में इहलोक सुधरणै रा मोकळा प्रमाण मौजूद है। कैय सकां कै दान परलोक सुधारण सारू करीजै अर चंदो इहलोक नै पैला सूं सांतरो बणावण सारू दिरीजै।
दान अर चंदो देवणियै अर लेवणिये रै भावां में ई जमीं-आभै जित्तरो आंतरो रैवै। दानवीर आपरै दान नै गुपत राखणो चावै पण दान लेवणियो बीं रा गुण गावतो नीं थावैâ। पण चंदै रो लेण-देण गुपताऊ राखीजै क्यूंकै अठै मामलो परलोक सुधारण रो नीं, इहलोक नै पैला सूं बेहतर बणावण रो हुवै।
साधारण जीव इण लोक में कष्ट भोगै जणै बे आपरी सामरथ सूं बेसी दान-पुन्न कर’र आगोतर सुधारण रा सुपना देखै। इणलोक में सुरग उनमान भोग-विलास करणिया धनपति, पूंजीपति, उद्योगपति सुरग नै आपरी बपौती मानै अर इहलोक नै ई परलोक मानता थका अठैरी राज सत्ता नै ई विधाता मानै अर बीं नै राजी राखण सारू धपटवों गुपताऊ चंदो देयनै सरकारी जांच अ‍ेजेंसियां रै घेरै‌ सूं मुगत रैवै, बां नै अरबूं-खरबूं‌ रा ठेका मिलै अर आपरी काळी करतूतां माथै पड़दो न्हाखनै ऊजळी अर साफ-सुथरी छिब दिखावै। धनपतियां सारू सत्ता ई भगवान चित्रगुप्त है। सत्ता रै अकांउट में चंदे रा करोड़ूं रिपियां रा इलेक्ट्रॉल बॉन्ड जमा कराय’र बे आपरो इहलोक अर परलोक दोनूं सांतरा बणाय लेवै। बां रै मौज ई मौज। जणै ई आज रा महाग्यानी कैवै कैकै दान दियां धन घटै अर चंदो दियां धन बधै।
आप ई इहलोक अर परलोक बेहतर बणावण सारू दान री ठौड़ चंदो देवणो सरू करदो सा।

अन्य समाचार

अब तक