बुलाकी शर्मा राजस्थान
पेंशनर्स व्हाट्सअप ग्रुप में आज गजब री चहल-पहल। दनादन कमेंट्स आ रैया है-
– म्हारी पेंशन बैंक अकाउंट में डिपोजिट हुयगी है।
– म्हारै मैसेज कोनी आयो। आपरो अकाउंट कुण सी बैंक में है वर्मा जी।
– अेसबीआई में है, व्यास जी। दिनुगै आठ बजी ई मैसेज आयग्यो हो।
– ओह, म्हारली पीअेनबी हरेक महीनै लेट करै। आंख्यां फाड्यां चैक करतो रैवूं पण मैसेज कोनी आवै।
– म्हारो अकाउंट ई पीअेनबी में है। म्हारी पेंशन तो जमा हुयगी।
– इयां कियां, रंगो जी? फेर म्हारै मैसेज कियां कोनी आयो?
– कणैई मैसेज आवै कोनी। आप फोन पे चैक करो। पक्कायत जमा हुयगी है।
– पेंशन तो जमा होगी ही है व्यास जी। किसी की पहले किसी की बाद में। इतनी भी क्या हड़बड़ी है?
– तीस दिन उडीक करतां पैली तारीख आवै, थां नै हड़बड़ी लाग रैई है, वाह माथुर साब। जबरा हो।
इण बिचाळै कोई पेंशनर साथी वॉइस चैटिंग करण लागै। अेडमिन बरजै- ग्रुप में वॉइस चैटिंग नो अलाऊ।
– आज पैली तारीख नै तो छूट दिरावो अेडमिन साब। गणपत जी चैटिंग कर रैया है। मोबाइल माथै बां नै लिखणो कोनी आवै। पेंशन रै बारै में ई पूछ रैया हुवैला।
– अबकी जिकी पेंशन जमा हुई है, बीं मांय बधियोड़ो डीअे सामल है क्या?
इण मैसेज रै आवतै ई खिल-खिल हंसतां रा चार-पांच इमोजी पेंशनर साथियां रा आवै।
– अरे भाई साब! सरकार डीअे रो छांटो छिड़को ई कोनी करियो अर थे जमा रा सपना देख रैया हो।
– हूं सुणी ही जणै पूछ लियो, ई में सपनो देखण रो मोसो देवणो चोखी बात कोनी है मुखिजा जी। म्हनैं कैवणियो गलत कोनी हुय सकै। सिंघ साब, गुप्ता जी, छंगाणी जी, विमल जी सरीखा रूल्स री अपडेट राखणिया अकाउंट्स रा मोटा रिटायर्ड अफसर है। बे कैयसी जणै भरोसो हुसी।
– आप क्लियर करो नीं प्लीज सिंघ साब। नीं जणै भाई साब डीअे लियां बिना मानैला कोनी।
– सरकार ने अभी डीअे की घोषणा नहीं की है शर्मा जी। घोषित होते ही मैं बता दूंगा आपको।
– अबै नैहचो हुयग्यो है अेफअे साब।
– खुश खबरी! म्हारी पेंशन ई बैंक अकाउंट में जमा हुयगी है। अबार मैसेज आयो है।
– बधाई व्यास जी। अबै बिरजा महाराज री मोतीपाक हुय जावै।
– पेंशन सगळां रै जमा हुई है, मिल’र गोठ करलां।
चैटिंग रात तांई चालसी। पहली तारीख है नीं!