बुलाकी शर्मा
राजस्थान
आम अर खास सारू शानदार ऑफर। किफायती दामां में घर बिकाऊ है। अेक घर री कीमत फकत सौ रुपिया। हां सा, सिरफ सौ रुपिया। मजाक कोनी कर कैयो। साची कैय रैयो हूं।
कांई फरमायो? किसै स्हैर कै कस्बै में बिक रैया है? हुकुम, आपांरै देश री पंचायतां कै नगर निगम इसी नासमझी करण सूं रैई। अठै तो वोटां सारू फोकट में धान बांटण री योजनावां चालै। सौ रुपियां में घर मालिक बणावण री गलती कोनी करीजै। अर अबै घर नीं फ्लैट रो जमानो आयग्यो है। किस्तां पैला भरावै। बीं किस्तां रै रुपियां सूं सात-आठ साल में फ्लैट चिणीजै अर पछै अलोट करीजै। जे म्हारै जिसो कोई आम आदमी घर खरीदण रा सुपना देखै तो बीं नै मानसिक रोगी मान’र लोगड़ा मखौल उडावण लागै। हां, जिका साहसी है, राज में पेठ राखै, बे सर्वे भूमि गोपाल री मानता थकां खाली पड़िया घरां माथै कब्जो करै, सरकारी-गैर सरकारी जमीन नै खुद री मान’र आलीशान बंगला खड़ा करै। बीं नै नाजायज कब्जो बतावणिया मनोमन कठैई नाजायज कब्जो करण री सोचै, पण बे छप्पन इंची काळजो कठै सूं लावै।
हां, सही समझ्या। हूं आपांरै देश री नीं, विदेश री बात कर रैयो हूं। फ्रांस रै अेक स्हैर रो ऑफर है। जिकां कनै पैला सूं घर नीं है, बां नै सौ रुपियां में घर बेच्या जा रैया है। शर्त आ वैâ पैला बीं नै रैवण लायक बणावण सारू मरम्मत करावणी पड़सी। किरायै नीं देय सको अर कम सूं कम तीन बरस रैंवणो जरूरी। मरम्मत पेटै पांच-सात लाख रुपियां रो खरचो कर’र ठाठ सूं आपरै घर में रैवो। खास बात आ कै शर्तां में चूक करियां दियोड़ो अनुदान पाछो लैय’र सरकार जुर्मानो लगा सकै।
ऑफर सांतरो है। म्हारो मन ई ललचाय रैयो है पण जेब में हुवै नांणो जणै ई बींद परणीजै काणो! फ्रांस जावण री औकात कोनी जणै अठै किरायै रै घर में दिन तोड़ना मजबूरी है। पण सूत्रां सूं खबर मिली है कै ‘सर्वे भूमि गोपाल री’ मानणियां जांबाज भारतीय फ्रांस पूग चुक्या है। तिया-पांचा भिड़ा’र इण सरकारी योजना रै तहत थोक में घर खरीद’र तीन बरसां पछै लाखां में बेचण री योजना है बां री। अबै भारत, भारत नीं, न्यू इंडिया है अर न्यू आइडिया सूं बठै रै सरकारी अफसरां री जेब भारी कर’र ‘बळ पड़ता जाळी-झरोखा’ री विधि समझाय’र बै कामयाब हुसी, पक्को भरोसो है।