रेफरी घूस खायग्यो
खेल शिक्षक रूप म्हारी पैली पोस्टिंग गांव में हुई। म्हारै स्हैर सूं अठारै-बीस कोस दूर। सरकारी जवांई भागी मिनख ई बणै। ज्योइन करणी जरूरी पण घर सूं दूर रैवण री पीड़ झेळणी दोरी। स्कूली टाबरां री कुटाई कर’र बां में खुद री पीड़ बांट’र हळको हुवतो। बीं टैम छोरां साथै मारा-कूटी करणियां मास्टरां ई इज्जत घणी हुया करती। छोरा घरै आपरै बाप सूं थापा-मुक्कां रो नास्तो कर’र स्कूल आवता अर स्कूल में गुरुजी री बेंत बां नैं धाप’र जिमावण सारू त्यार रैंवती।
स्कूल में म्हारा फगत दो काम हा। टाबरां नैं खेळावणो अर कूटणो। टाबरां रा घरआळा म्हारी इज्जत करता। गांव रा सेठजी रैवण सारू फोकट में कमरो देय राख्यो हो। जमींदार जी रै घर सूं दोनूं टैम दूध आय जावतो। कोई घी पूगाय देंवतो। टाबरां साथै मारा-कूटी करण रो इनाम हुवतो ओ।
खेलकूद प्रतियोगितावां में खेल शिक्षक रेफरी हुया करता। म्हैं ई रेफरी री जिम्मेदारी निभावतो। बीं टैम फोकट में घी-दूध-माखण पूगावणियां, फोकट में कमरै में रैवण री सुविधा देवणिया माईतां नैं आपरै लाडकंवरां रै भविस री चिंत्या हुवती। म्हनैं हिदायत दिरीजती- पढ़ण में ऐ ठोठ है पण खेलां में आं नैं जीतावणा है मास्साब। रेफरी हो थे। चावै जिकै नैं जीता सको। थांरै रेफरी हुवता थकां जे म्हांरा छोरा मैच हारग्या तो थांरा हाथां-पगां री तोड़-भांग करता ए छोरां म्हांरै मना करतां ई मानैला कोनी।
फोकट में मिल्योड़ी सुविधावां साम्हीं रेफरी रो फरज डर’र लुक जावतो। म्हारो काम हुवतो, जीतणियां खिलाड़ियां नैं हरावणो अर आं हारणियां छोरां नैं जीतावणो। मैच देखणिया रीस में नारा लगावता – रेफरी घूस खायग्यो। हारियोड़ां नैं जीतायग्यो…! बीं टैम ऐ नारा म्हनैं म्हारी जीत उनमान लागता- रांड्यां रोंवती रैवै जवांई जीमता रैवै। रेफरी रो धरम खेल रै नियमां रो पालण करावतै सही फैसलो करण रो हुवै पण म्हैं पखापखी कर’र हारियोड़ी टीमां नैं जीतावतो रैयो।
‘थांनैं रिटायर हुयां दस-बारै बरस हुयग्या अबै ऐ जूनी बात्यां कियां चेतै आय रैई है मास्टर जी?’
बे उदास हा। बोल्या,‘आं दिनां ‘वोट चोर गिद्दी छोड’ री गूंज सुणूं जणै म्हारै कानां में रेफरी घूस खायग्यो सुणीजै। जिकां साथै नाइंसाफी करी, बां टाबरां री पीड़, नाराजगी, गुस्सो म्हनैं सोवण कोनी देवै भाईड़ा।’
‘सुवारथ-वसु पैला गलती करणी फेर पिछतावण सूं कांई बंटै? खोटा करिया है जणै भुगतणो ई पड़सी।’ बे आपरै बेली सूं सहानुभूति री उम्मीद राख राखी ही पण बीं रा ऐ बोल सुण’र बे घणा दुखी हुयग्या है।
रौबीलो राजस्थान : बुलाकी शर्मा राजस्थान
