बुलाकी शर्मा राजस्थान
‘दियाळी रा राम-राम काळू म्हाराज।’
‘रामी-राम भाइड़ा रामी-राम।’ कुर्सी माथै बैठण रो इशारो करतां बे कीं उखड़ियोड़ा-साक बोल्या, ‘सरकारी महकमां रो तो राम ई निसरग्यो है। सुख सूं कोई परब-त्योहार मना लेवै, मजाल पड़ी है बां रै हुवतां।’
दियाळी माथै सगळा सरकारी महकमां ल्याई अलर्ट मोड में हा। केई महीनां सूं मोटा-मोटा खाडां सूं घायल सड़क्यां री सुध लेयनै बां रै पाटा-पोळी करी। खास-खास मारगां री साफ-सफाई कराईजी है। खास सरकारी महकमां, खास कॉलोनियां रै साथै खास मार्केट आद केई ठौड़ पंचदिवसीय दीपोत्सव माथै लाइटिंग कर’र रातां नै पळपळाट करी।
मिलावटियां नै पकड़न नै मुस्तैद रैया। जुआ-सट्टा खेलणिया नै ई बे बखस्या कोनी। रिश्वतखोर छोटा कार्मिकां साथै अफसरां तकात नै छोड्या कोनी। डोडा, पोस्त, गांजो, हेरोइन, अेमडी आद नशा-पतां रो काळो धंधो कर’र जवान पीढ़ी नै खराब करणिया माथै सिकंजो कसण सारू नारकोटिक्स टॉक्स फोर्स अेक्टिव रैई।
आपरी सुस्ती अर लापरवाही नै पोस्टपोंड कर’र आठूं पौर अेक्टिव रैय’र सरकारी महकमां रा करियोड़ा आं कामां नै गिणावतो बां नै म्हैं भूंडियो, ‘जनता री सुविधावां रो ध्यान राखण में सगळा महकमा अलर्ट रैया अर थे तारीफ री ठौड़ भूंड कर रैया हो! त्योहार री सुभ घड़ी तो सुभ बोल्या करो म्हाराज।’
इण बिचाळै बां रो पोतो सकरपारा, मैदै री नमकीन, चासणी रा पैठा, गुंजिया, बैंसण री चक्यां आद घरै बणायोड़ा आइटमां सूं भरियोड़ी प्लेट अर दो कप चाय टेबल ऊपरां राख’र म्हारै पगै लागणी कर’र पाछो बारै निसरग्यो।
बां म्हासूं ई सवाल करियो, ‘आ बता कै मिलावटियां, रिश्वतखोरां, नसै-पतै रो धंधो करणियां, जुआ-सट्टा खेलणियां-खेलावणियां सारू दियाळी दूजी हुवै कांई?’
‘ना…।’
‘मिलावटखोरी, जुआ-सट्टा, नशाबाजी, रिश्वतखोरी आद गलत काम त्योहारां ऊपरां ई हुवै कांई?’
‘ना म्हाराज। अे तो बाहरै मास चालता रैवै। अे रुक्या करै कांई?’
‘जद सरकारी महकमां री मिलीभगत अर ढिलाई सूं अे लोग आपरो धंधो रोजीना निसफिकर करता रैया है जणै दियाळी माथै बेसी फायदै री बां उम्मैद लगा राखी ही पण बां रै खिलाफ सख्त अेक्सन लेय’र बां रै अर बां रै परिवार री खुशियां माथै हमलो करण नै कांई मानसी भाईड़ा?’
म्हनैं बेसण री चक्की खांवता देख’र बां बात आगै चलाई, ‘शुद्ध के लिए जुद्ध, शुद्ध आहार मिलावट पर वार आद अभियान मौकै-टोकै री ठौड़ रोजीनै चालू रैवै जणै बात बणै भाईड़ा। त्योहार हुया अर आं सीजनल अभियानां री ई रामरमी! जबरा है सरकारी महकमा।’
प्लेट रा आइटम पेट रै हवालै कर’र म्हैं चाय री चुस्कियां लेंवण लाग्यो।
रौबीलो राजस्थान : सीजनल अभियानां री राम-रमी सा
